媽：我自問真係做到加零一、問心無愧，或者我不是完美，但我自問好錫個仔，到底佢重想我點？
仔：媽咪真係好煩，佢係錫我我知喎！但佢乜都要人聽晒佢話，我講乜佢都唔聽，唔止我，連爹哋、細妹、重有舅父、亞姨都係，點可能有人咁霸道？一句「為你好」大晒咩？舅父、亞姨叫我唔好激媽咪，因為佢一世都為頭家，自小出社會工作都係為佢地，因為公公早死，媽咪放棄晒自己前途，所以佢地乜都聽佢講，佢永遠是對的，不過佢地背後都有講佢壞話。點可能有人永遠是對的？佢今日咁霸道係佢地縱容出黎，我唔認為我要跟大隊。我地唔係應該有自己思考嘅咩？我16歲啦！連興趣、科目、朋友都要佢同意，我唔係3、4歲啦。只係想講返自己意見都比人話唔應該、無禮貌、唔尊重媽咪。到底啲大人有無道理？我依家唯有盡量唔比佢知我啲嘢，唔出聲、唔反駁，可以嘅話就跟自己方法，唔穿煲咪好彩囉！比佢知咪由得佢嚕囌、忍受下，過左無事就得，避得就避，DSE後就希望入大學、住宿舍自由啲，到時佢管唔到咁多。
媽：有時覺得好大壓力，仔女有咩錯失都入我數，係我教導無方、我失敗、慈母多敗兒，呢啲難聽嘅說話我唔想聽。所以步步為營，又無支援，個個覺得我好打得，淨係識有困難就揾我，我就一切扛起，從來無人問我攰唔攰、要唔要幫手、不如抖下啦。無人會理會我，就算病都無人知，有時真係好攰好無趣。老公？有咩可以期望？佢就只係其中一個被照顧嘅人，會比家用，每次都提我慳住使，我從來都無使錢喺自己身上，就係唔明佢點解咁講，很難聽。總之做就有份，巴不得仔女大左，我清清靜靜，到時可以自由自在。
Comments